“أنا الشقيان”.. شعر هاني الحوت

“أنا الشقيان”.. شعر هاني الحوت الشاعر هاني الحوت، أثناء عمله بالمحارة، تصوير: أسماء الفولي

أنا الشقيان
وزيي كتير في كل مكان
أنا اللي عشان أعيش مستور
شربت الكوتة بالألوان
أنا فلاح زرع أرضك
وطرحت خير لناس غيري ومش ليا
أنا عامل في 100 مصنع
وبصنع طاقة بأديا
أنا بنا وببنيلك
بنيت اسمك على نيلك
أنا بنا بنيتك طوب
في وسط الناس بقيت مغلوب
بنيت الصبر بالمدماك
فقال الصبر يا أيوب!
أنا نجار بعيش وسط الخشب عمري
وادوق المر علشانك
وأدق على الخشب إسمي
وأسمرلك وتبتسمي
وأصب بعمري عمدانك
أنا حداد وبصنع لك
حديد من صلبي يحميكي
أنا سباك بكوع مكسور
لكني بدور وبسقيكي
أنا نقاش وضعت بلاش
وبسهر ارسمك بايدي
أنا اللي بقلب الألوان
وبختارك في كل مكان
الون فيكي بالفرشة
ابات الليل في حضن رصيف
وانام من غير ولا فرشة
وغيري بتفرشيله رموش
أنا محار وعايش عمري في الرملة
وفي الأسمنت
انا اللي داريت حيطان ضلعك
ومن ضلعك عملت جيوش
أنا اللي سلاحي كان بروه
وضلعي الحامي يبقى طالوش
أنا اللي حلمت بعدالة
لكن حلمي بقى فنكوش
أنا الفران
قصاد النار ببات سهران
واجيبلك من عيوني العيش
أنا الشارع انا الكورنيش
أنا الجندي اللي مات في الجيش
انا الشاعر وبكتبلك
حروف من دمي بالألوان
أنا صنايعي وأنا عامل
وأنا بياع خضار غلبان
وأنا مدرس بكام ملطوش
وأنا موظف ونمت جعان
وأنا اللي عايشها متغرب
عشان القى لحياتي مكان
أنا الشقيان

الوسوم