“حلق حوش”.. شعر هاني الحوت

“حلق حوش”.. شعر هاني الحوت هاني الحوت- تصوير أسماء الفولي
الفقر وحش بينهش المساكين
وحزين يا شاعر تسكنك أبيات
بيبات فقير يشكي الهموم دواوين
يصبح خريطة في رحلة المتاهات
أوقات بقول للشمس ما تغيبي
وأحضن في ليل بيداري أناتي
وأضحك قصادك من صميم الروح
وجروحي كون بيهد ضحكاتي
خبيت ملامح حزن جوايا
صرخت حروفي في وش أبياتي
جوايا طير يعزف قصايد شجن
مسجون في ذاته وحر من ذاتي
فبلاش تلوموا الشعر والشاعر
الهم زاعر كل قلب ضعيف
وأنا قلبي ضحكة اتحولت أحزان
هيمان في شارع مش لاقيلو رصيف
عازف وعارف قسوة الحرمان
غرقان عينه ولحن صوته كفيف
جوايا شيخ ملبوس بيحضر العفاريت
جوايا واعظ كفر بالحكي في الحواديت
شديت خيوط الليل فشدتني
غسلت حلمي بأيدي كفنته
ودفنته وسط الهوا وحرقته في التوابيت
أنا بيت وحارة وليل ملوش آخر
أنا زرع أخضر مات وف جسمي سوس ناخر
أنا قلبي حضن كبير
نوع في القلوب فاخر
كتفي سفينة وشايله كل الناس
والضهر محني عشان اوصلهم
اتاريني بنسج مني توب بمقاس
عروك يا توبي وقطعوا أوصالهم
كتفت أيدي عشان متكتبشي
وضربت وحي الشعر برصاصة
سهرت حروف الليل مع رمشي
فلقيت قصيدة حزن غواصة
أنا نيل وعايش بروي كل الخلق
عطشان وناشف جوه مني الحلق
عديت بلاد وسقيتها بكفوفي
ضهري السليم فلقوه قصادي فلق
يا طريق مسافر قولي آخرك فين؟
قدام عيوني الخطوة بتعاني
رجليا حافية وزرع أرضك شوك
رحال مسافر وسط أحزاني
الضهر محني وقلبي لخضر شاب
والليل بيعزف لحن حرماني
خبيت ملامح كل شئ فيا
وفردت وشي لبكره يبقى بشوش
جوايا جيش أوجاع يهد جبال
بركان بتصرخ بين لهيبه وحوش
شوفتوني بضحك قولتو عايش رضي
ورضيت بدنيا تاخدني حلق حوش
الوسوم