هو ينفع آخد دم من أي حد؟

طيب ينفع ناخد دم من مصدر تاني غير الإنسان (حيوانات مثلاً)، أو نعمله في المعمل؟

حاولت أصرف دم من بنك الدم والدكتور قال لي مش لاقي دم “متوافق”

هو ليه بعض السيدات بيخلفوا أول مرة وبعد كده لأ وكل مرة الجنين بيموت؟

هو ليه في ناس مش بتلاقي دم بسهولة؟

عشان نجاوب على كل الأسئلة دي، لازم نحكي الحكاية من الأول، بس قبل ما نحكيها، لازم الأول نعرف شوية معلومات بسيطة عن الدم و النظام المناعي للجسم..

تعريف الدم

الدم هو سائل الحياة الذي ينقل الغذاء والأوكسجين لجميع أعضاء الجسم، ويتكون من:

بلازما: وهي عبارة عن مياه تحمل البروتينات والأملاح والمعادن ويسبح فيها خلايا الدم.

تعريف الدم

خلايا الدم: وتنقسم إلى 3 أنواع:

خلايا دم حمراء: وهي مسؤولة عن نقل الأوكسجين.

خلايا دم بيضاء: وهي المسؤولة عن المناعة.

الصفائح الدموية: والتي تساعد على وقف النزيف.

لذا يمكن تشبيه الدم بكوب من الشاي يعني نقدر نشبه الدم بكباية شاي. ماية الشاي اللي دايبب فيها السكر هي البلازما، و حبيبات الشاي هي الخلايا.

 

و زي ما حبيبات الشاي بتدي كباية الشاي لونها المميز، فخلايا الدم الحمراء بتدي الدم اللون الأحمر للنظام المناعي للجسم

المعلومة اللي محتاجين نعرفها هي أي جسم غريب بيدخل جسم الإنسان، يبدأ الجسم يحاربه عن طريق تكوين “أجسام مضادة” Antibodies (Abs)، و بنسمي الأجسام الغريبة دي “مولدات الأجسام المضادة” Antigens (Ags) و للتسهيل هنسميها “مولّدات”.

نرجع بقى للحكاية بتاعتنا وازاي تم اكتشاف فصايل الدم..

سنة 1900، عالم نمساوي إسمه كارل لاندشتاينر Karl Landsteinerلاحظ إن خلط الدم من شخصين مختلفين أحياناً بيؤدي لتفاعل في صورة

تلاصق/تلازن للخلايا (Agglutination) ممكن نشبهه بتكوين جلطات صغيرة. بعد عمل أبحاث كتير اكتشف ان دم الناس مش كله زي بعضه، و ان الاختلاف ده ناتج عن وجود مولدات مختلفة على سطح كرات الدم الحمراء. الملاحظة دي ساعدته على اكتشاف نظام تصنيف الفصائل الدموية المعروف دلوقت بنظام ABO(ABO System)، و ده ببساطة بيقول ان الشخص الموجود عنده المولّدات من نوع A(A Ag) تكون فصيلته A، و لو موجود عنده (B Ag) تبقى فصيلته B.

لو عنده الاتنين تكون فصيلة دمه AB، و لو مش عنده أي واحدة منهم يبقى O.

كارل لاندشتاينر Karl Landsteiner

لاندشتاينر اكتشف برضه ان اختلاط دماء من نفس الفصيلة مش بيسبب تفاعلات ضارة (تلازن)، و اكتشافه ده أدى لأول نقل دم ناجح سنة 1907بواسطة طبيب أمريكي إسمه روبن أوتنبرج Reuben Ottenberg (طبعاً كان في محاولات كتير قبل كده لنقل الدم لكن معظمها كانت عشوائية).

بسبب أبحاثه دي، حصل لاندشتاينر على جائزة نوبل في الفيسيولوجي و الطب سنة 1930 و لقّب بـ “والد طب نقل الدم”، و ما زال العالم لحد النهارده بيحتفل بعيد ميلاده يوم 14 يونيو تحت إسم “اليوم العالمي للمتبرع بالدم”اللي بيتم فيه تكريم المتبرعين المنتظمين بالدم تقديراً لمساهمتهم المستمرة في انقاذ حياة المرضى.

سنة 1940، لاندشتاينر و عالم أمريكي تاني اسمه ألكساندر Alexander S. Wienerنشروا بحث عن نوع تاني من المولدات موجود على سطح خلايا الدم الحمراء سموه عامل ريساس RH Factor لأنهم كانوا فاكرين انه نفس النوع الموجود في دم قرود ريساس (لكن بعد كده اتضح ان في اختلافات كتير بينهم بس كان الإسم انتشر و ماقدروش يغيروه).

المهم ان نظام تصنيف الفصائل حسب عامل ريساس Rh هو المسئول عن وجود فصائل دم موجبة و سالبة. يعني لو الـ AgRh موجود على سطح الخلايا تبقى الفصيلة موجبة Rh+، و لو مش موجود تبقى سالبة Rh-. و السبب في اكتشاف النظام ده كان ورقة علمية نشرها اتنين تاني من العلماء حاولوا ينقلوا دم لواحدة ست و حصل تلازن مع دم 80% من المتبرعين من نفس فصيلتها.

الحقيقة ان لغاية شهر نوفمبر 2014 تم اكتشاف 35 نظام لتصنيف فصائل الدم لكن أشهرهم على الإطلاق ABO/ Rh، و ده اللي بيؤدي أحياناً لـ “عدم توافق” بين دم المتبرع و دم المريض بالرغم من انهم من نفس فصيلة ABO/Rh.

طبعاً الكائنات الأخرى زي الحيوانات مثلاً عندهم فصائل مختلفة عننا و بالتالي المصدر الوحيد للدم حالياً هو الإنسان عن طريق التبرع.

في أبحاث حالياً لاجراء تعديلات وراثية على بعض أنواع الحيوانات عشان يحصلوا منها على نفس فصائل الدم البشرية، و أبحاث أخرى لتصنيع الدم في المعامل بكميات كافية للنقل للمرضى، غيرها لتعديل الفصائل بحيث تنتج الفصيلة O.

طيب، تعالوا نحكي أكتر عن ABO/Rh..

زي ما وضحنا قب كده ان اختلاف الفصائل سببه وجود مولدات مختلفة على سطح كرات الدم الحمرء، و لأن المولدات دي خاصة بالشخص ده فبالتالي مش هيكون ليها أجسام مضادة ضد نفس النوع، لكن الجسم بيكون أجسام مضادة ناحية الأنواع التانية. عشان كده نلاقي الشخص صاحب الفصيلة A عنده أجسام مضادة لـ B اللي تعتبر غريبة عن جسمه، و العكس صحيح.

طبعاً صاحب الفصيلة AB مفيش عنده أي أجسام مضادة، و صاحب الفيلة O عنده أجسام مضادة ضد A و B زي الصورة كده.

فصائل الدم

بالنسبة بقى للـRh  فالموضوع مختلف شوية..

لو واحد Rh+ مش هيكون عنده مضادات Rh، و لو Rh- برضه مش هيكون عنده مضادات Rh لكن هتتكون بعد أول اختلاط لدمه بدم Rh+.

يعني ايه الكلام ده؟؟

يعني لو واحد Rh- اتنقل له دم Rh+ هيعدّي منها أول مرة، لكن في تاني مرة جسمه هيكون مضادات Rh و ممكن يموت فيها.

و ده نفس السبب اللي يخلّي الأم لو هي Rh- و خلفت طفل Rh+  زي والده ممكن ماتقدرش تخلف تاني لأن اختلاط دم الطفل بدمها أثناء الولادة بيخليها تكون أجسام مضادة تتنقل للطفل التالي عن طريق المشيمة و يموت لو هو Rh+.

 

لو رجعنا بقى لسؤال ينفع آخد دم من أي حد هتكون الإجابة ان في ناس يطلق عليهم المعطي العامUniversal Donor و دول فصيلة دمهم O- لأن دمهم لا يحتوي على أي مولدات، و بالتالي لما يدخل جسم المريض مش هيتفاعل مع الأجسام المضادة و يسبب مشكلة.

و برضه في مستقبل عامUniversal Recipient و ده فصيلته AB+ لأن دمه لا يحتوي على أى أجسام مضادة، و بالتالي لو أى دم دخل جسمه مش هيلاقي أجسام مضادة تتفاعل معاه و تسبب مشكلة.

لكن يفضل دايماً ان كل واحد ياخد فصيلته إلا في حالات الطواريء لما يكون مفيش وقت لعمل اختبار فصيلة و توافق للمصاب.

فصائل الدم

نيجي بقى لآخر سؤال، ليه بعض الناس مش بتلاقي دم بسهولة؟

أهم إجابة للسؤال ده ان في فصائل نادرة مش متوفرة بكثرة

طبعاً في اسباب تاني ان الناس تواجه صعوبة في انها تلاقي دم من ضمنها الأمراض المزمنة اللي فيها المريض بيبحتاج دم بصورة منتظمة، و مع الوقت بيكون صعب يلاقي كيس متوافق معاه بسبب الأجسام المضادة اللي جسمه بيكونها.

الجدول ده بيوضح نسب تقريبية لتوزيع فصائل الدم في مصر. هنلاحظ ان اكتر فصيلة منتشرة هى O+ و أقل فصيلة موجودة هي AB-.

AB- O- B- A- AB+ O+ B+ A+
0.2% 5.0% 0.6% 2.0% 3.8% 52.0% 12.4% 24.0%

 

و الحقيقة بنوك الدم بتحتاج كل أنواع الفصائل لأن الفصائل المتوفرة المرضى بتوعها كتير، و الفصائل النادرة المتبرعين بيها قليلين، فلو سمحت متقولش أنا فصيلتي موجود زيها كتير و ممكن غيري يتبرع، أو أنا هأخلي الدم لما حد يحتاجه أروح أتبرع لأنك في الأغلب مش هتلحق و هيموت.

ساعدوا بنوك الدم ان دايماً يكون عندها رصيد كافي عشان يلحقوا المرضى و المصابين و كمان يعالجوا حالات كتير بتحتاج دم بصورة منتظمة زي مرضى الفشل الكلوي و الأورام و الأطفال المصابة بالثالاثيميا و غيرهم كتير مش بتسمعوا عنهم.

تبرعك بالدم ممكن ينقذ حياة 3 أشخاص..

لو راجل، تقدر تتبرع كل 3 شهور. و لو ست، كل 4 شهور.

و أخيراً أنصحكم بشدة أنكم تعرفوا فصيلة دمكم لأن ده ممكن ينقذ حياتكم و حياة ناس تاني. تقدروا تروحوا أي معمل و تطلبوا تحليل ABO/Rh عشان وقت الاحتياج تكون معروفة.

و طبعاً المقبلين على الزواج و المتزوجين حديثاً ، لازم تعرفوا فصيلة دمكم لأن لو الزوج Rh+ و الزوجة Rh- يبقى احتمال كبير الزوجة تحتاج حقنة Anti-Rh عند الولادة.

و إلى لقاء آخر..