زمقان وهطق كمان تاني.. للشاعر الدكتور المستشار علي أحمد شلوفه

زمقان وهطق كمان تاني.. للشاعر الدكتور المستشار علي أحمد شلوفه الشاعر المستشار علي أحمد شلوفة
كتب -

زمقان وهطق كمان تاني

والناس هتفرقع حواليه

والكل بيسأل ويقول

احنا في أسيوط

ليه نبني نطلع ترخيص

ندفع لو تأمين وضرائب

ونجيب رسومات

ومهندس ومقاول يمضى

وياخد أتعاب

ونسيب ربع الحته مناور

ولا نقدر نعلي ولو قالب

ونخالف شرط الترخيص

وتروح في ضواحي المحروسة

تبني براحتك

حتى على الأرض الزراعية

وتقسم على كيفك فيها

ترسمها شوارع بمزاجك

كبرت كبرت

صغرت صغرت

وتطلع أبراج في حواري

من غير ترخيص

وتدخل للمبني مرافق

ولا حد يقف لك في طريق

أنا شوفت هناك شغل يجنن

روح فيصل

روح كفر طهرمس

روح شبرا

روح المطرية

روح أي مكان في المحروسة

هتشوف أبراج

زي الغابات

تحتيها كهوف

لا تشوف الشمس ولا النور

واحنا يا عيني

حسب القانون

لابد نطلع ترخيص

مش عارف ليه التمييز

مش بقيت مصر بلد واحد

من يوم مينا

وكمان فرعون واحد فيها

جاوبوني يا أهل المحروسة

اشمعنا انتو

وأشمعنا احنا

وهنعمل أيه بالقانون

والحال على عينك يا تاجر

والشقة حداكم ميسوره

بخلاف أسيوط

سامحونا يا أهل المحروسة

مهناش بنقُر ولا بنحسد

احنا بنسأل

والظن يودى ويجيب

وكمان مينا

مش عارف أيه اللي جري لو

من يوم ما عدل وشو مبحر

وترك طيبه

وفضل فيكم

واتمتع بطراوة بحري

مبقيش يسأل

وسايبكم تبنوا على هواكم

وولاتو في طيبه وحواليها

قاعدين ماسكين

مش عارف ليه

مش كفيانا

الوادي الضيق حيرنا

والجبل إتباع

والفقر عامل فينا عمايل

والحر كمان

لله يا أهل المحروسة

وصوا علينا

عايزين نتعامل زييكم

أحسن ما نهاجر ونجيكم

مانتوا شاوس

واحنا غلابه

والمعني في بطن الشاعر

مش عايز شرح وتفصيل

 

الوسوم