سبوع يرجع.. للشاعر علي أحمد شلوفه

سبوع يرجع.. للشاعر علي أحمد شلوفه المستشار الدكتور الشاعر علي أحمد شلوفه

سبوع يرجع من أيامك

يوش السعد يا أمي 

وأبوي يعود

يحاديني

يناديني 

ويديني بايدو الحلوا مصروفي

وأبوس إيدو

ويدعي لي

وينصحني 

يوصيني أنام بدري

يصحيني أصلي الصبح 

قبل الشمس ما تطلع

يجهزني ليوم يبدأ من الأول

يخليه لي نهار كامل

نهار واعد ومستني

يأدب لي عيال تسهر على الفاضي

وتغفل عن صلاة الصبح

تبقيها ولا تسأل

وبنت الناس يرسيها

يوصيها تصون العهد والعشره

سبوع يرجع

وأبوي يعود

نروح السوق

ونتسوق

نجيب ونجيب

ونتزود

ويكفينا جنيه واحد

أبوس ايدك

يست الكل يابيضه

سبوع يرجع

تبريني

ويرجع لي حنانك فيه

سعات ما كنت باستني

تخضي القربه قدامي

وتدينى خبور زبده

وبتاوه

وكباية لبن رايب

وبتمني أروح تاني

ببور البرج

أطحن لك درا عويجه

تكون مخلوطه بالحلبه

ومن غيطي اللي خضرتو

على أيدي

ورويتو

وطهرتو ونقيتو

رغيف العيش بقي ماصخ

يسد النفس ويعذب

وبيجج وبيقول لى

مفيش لا حل ولا مهرب

ومش عارف دقيقو منين

وليه أسود ومتهبب

يدوم عزك واحسانك

أنا في عرضك سبوع يرجع

يصافيني

أنام وأصحي على حسك

يطمني

ينسيني هموم تقلت

مفيش غيرك يسليني

ولا يبكى على حالى

زمان كانت تجمعنا لياليكي

على غنوة وحجيوه

وتاخدنا حكاويكي

عن الشاطر

وست الحسن

عن خضره

وعن عنتر وعن عبله

وبين ضحكه وحدوته

يقوم يكبس علينا النوم

ويسرقنا

يسكتنا

ويطرحنا حواليكي

ولا يجينا قلق واصل

يريت ترجع كما كانت

لياليكي

وأيامك

سبوع منها يداويني

ويرضيني

ويكفيني أبوي يعود

أطل في وشو واتملي

وترجع ضحكتو تاني

ودكانو

وعمي سيد الخولي

أبو أحمد

ورمانه

كمان ويعود أبو سته

نجيب منو بلح منشر

بلح أصبح مفيش منو

ولا تقولي منين ترجع

جنينة سيد الخولي

ولا تقولي بنوها بيوت

ومش هيا لوحديها

وكان موجود جبل واسع

حواليها

وضاعت أرضها الخصبه

وخلوها دروب غبره

تتوه فيها

بدال ما كنت جواها

بتتفسح

وتتسبح

وتركب شجرة الجميز

وتتمرجح

تهز النخل يرمي لك بلح طايب

وبتنقي نبق أصفر

وعمك سيد الطيب يقول لك كل

ونقي كد ما تقدر

وخد لامك ولخواتك

ولا تقولي أديك شايف

على عينك

جدور النخل قلعوها

وحرقوها

وكيف ترجع وتتمني

سبوع يرجع

رسالتي إلي أمي يرحمها الله بمناسبة يوم الأم

الوسوم