قصيدة ( عادي) للشاعر أيمن هلال عباس

قصيدة ( عادي) للشاعر أيمن هلال عباس الشاعر أيمن هلال عباس

عادي صوتك عادى صورتك

عادى لونك عادى حتى دموع عيونك

عادى تاريخك يشيب

عادي طبطبتك تهيف

عادى كرباجك يصيب

عادى ينسى الضل صاحبه

عادى وجع القلب من اقرب حبايبه

عادى يبقى الحب عار

عادى يبقى الغدر غايه الانتصار

لما بخلصلك واحبك ببقى مستنى انتقامك

يبقى واحده بواحده نمشى

وبلسانى هقول كلامك

انتى لما نسيتى اسمى

كنت انا بمسح حروفك

وانتى لما اكلتى جسمى

كنت انابرسم خسوفك

واما قلتيلى هشوفك كنت بكتب مش هشوفك

يا قريبتى معودانى عمر

ماتردى ببانك الا للى بيجى قاصدك

واما قولتلك بحبك كنتى حطانى

فمقاصدك

قلت اقولك انى كارهك

ايوا كارهك لما اقولك فين يا حلوه سواد عنيكى

تقولى شوفهم فى الليالى

واما اقولك فين حلاوة العيد

تقولى العيد دى حاجه مبتجيش ابدا فبالى

كبرت البت الأصيلة الطيبة الطاهرة النقية

كاشفه وشها فى الشوارع

ماشيه سكرانه فليلها

والولد رافض يلم العار شويه

يبقى مين برضو اللى عايب

هو برضو ولاهيه

مش هقولك يوم يا خاينه

بس لازم اقولك ان الصوره بقيت حاجه تانيه

كل ما اقفل باب خرابه بتفتحيلها الف باب

تفرحى بالكاس وشربه وتدفنى العيش فى التراب

واما اجيكى عشان اعاتبك تؤمرينى بلاش عتاب

روح لجدك جنب كتفه سنده وابكى فجنازته

جدك اللى فعينه لونه وكلمته وميه قنايته

كل طير داق من حصاده

كل طير غاته ونجده

وابكى لو قلك يا ولدى

بس كيف راح تبقى ولده

شدى قلوعك وافرديها لفوق

عمر اللى مبلى فهواكى

من الهوا من يفوق

بصى علينا وشوفى نفسك فين

عند الامل تلقى الوجع مشنوق

لمى هرجك واكتبينى فأول الصفحة الجديدة

واما ترجعى تانى ليا

هبنى ليكى ألف ميت مليون قصيدة

 

 

الوسوم