قصيدة “قلبي انفطر” للشاعر عبدالرحمن مدين

قصيدة “قلبي انفطر” للشاعر عبدالرحمن مدين الشاعر عبدالرحمن مدين

قصيدة “قلبي انفطر” للشاعر عبدالرحمن مدين

قلبي انفطر بعد السمع
والنني رغم الليل لمع
شوقي اشتهى مني البكا
روحت ادندن فجر وسط البيت
والناس سنين بتمر مر
شريان حنين والباقي مر
لحظة ما فقت من الغنا
ملقتش قول منهم يسر
والشعر نابع من بواقي الخوف
عمى بيطلع من يتيم مكفوف
حسست على جدر الكلام
يمكن يشوف
فلقيتني صايب نفسي طلقة خوف
وكتبت شعر مقلتهوش صاحبي
وصيت يسنوا القلم قبل الفراق
ويخطوا بيه المدفنه قبلي
يمكن يحس ف مره على حبره
ويدوق قساوة الموت والاه والهلاك
وقعدت قبل الغسل اتشاهد
واكتب ف نص مخططوش شاعر
وحدي ساعتها وربنا شاهد
ان القصيدة وزنها داعر
خلصت قولت ان الزمن كان جدع
وفر عليا ف الفراق ما اندلع
وحبيبتي جايه تعزي بالاحمر
ساعتها فاق قلبي ومن ضلوعي انخلع
امي اللي دابت من البكا والنوح
فرحت فردت دمعها للعين
قالت خسارة يمكن اما اموت
ملقاش على جتتي م المخلصين باكيين
وابويا شمر عقله واتنهد
واخويا ولع سجارة وقال هنستهبل
وقالتلي بعد الغيبة الضمة ردت روح
وانا ارد بكتب شعر وباللي فات باسهد
غازلت بكارى الذكريات فيا
فاتشال غشاء العفة من عيني
ورجعت تاني لضحكتي ببكي
والموت ندالي وقاللي لبيني
فوقعت طابب قلبي من بره
وبدال ما اخش الجنة بتشاهد
دخلت نارها بقول ….
ضحكتها نور عيني

الكاتب/ عضو نادي الأدب بأبوتيج

 

الوسوم